Hafrannsóknastofnun

   
STOFNUNIN
RANNSÓKNIR
FRÉTTIR OG FRÓÐLEIKUR
RÁÐGJÖF
Fréttir
Svæðalokanir
Útgáfa
Sjávardýraorðabók
Ítarefni
Fjaran og hafið
Krækjur
Staða landana
Málstofa
Ársskýrslur
Ráðstefnur
Sjávarföll
Um skráningu meðafla
HELSTU NYTJASTOFNAR:
GRÁLÚÐA
Fréttir

26. maí 2016
Leiðangri r.s. Árna Friðrikssonar í Austurdjúp lokið

Í vikunni lauk þriggja vikna löngum leiðangri Árna Friðrikssonar sem hafði það megin markmið að meta magn og útbreiðslu norsk-íslenskrar síldar og kolmunna suður, austur og norður af Íslandi. Því til viðbótar var markmiðið að kanna vistkerfi sjávar með rannsóknum á átustofnum og umhverfisþáttum. Þessi árlegi leiðangur í norðaustanvert Atlantshaf í maí hefur verið farinn síðan 1995 og tóku þátt í honum auk Árna Friðrikssonar rannsóknarskip frá Noregi, Færeyjum, Danmörku og Rússlandi. Niðurstöður leiðangursins eru meðal annars nýttar við stofnmat Alþjóðahafrannsóknaráðsins (ICES) á norsk-íslenskri síld og til að fylgjast með langtímabreytingum á vistfræði hafsins.

Sameiginleg úrvinnsla á leiðangursgögnum skipanna fimm mun fara fram á næstu vikum og verða niðurstöður kynntar og notaðar á fundi ICES í ágúst n.k. við mat á stofnstærð og til þess að veita ráðgjöf um veiði úr áður nefndum uppsjávarfiskistofnum. Frumniðurstöður frá íslenska hluta leiðangursins sýna svipað magn og útbreiðslu norsk-íslenskrar síldar innan landhelginnar austur af landinu og undanfarin ár (mynd 1). Á svæðinu sunnan Jan Mayen mældist hins vegar öllu meira af síld en síðustu ár, og var þar í bland ókynþroska síld sem er óvenjulegt svona snemma árs.

mynd með umfjöllun


1. mynd. Bergmálsgildi síldar í maí eftir leiðarlínum Árna Friðrikssonar.

Kolmunni mældist í köntunum sunnan Íslands í svipuðu magni og síðustu ár. Þar var einungis um að ræða tveggja ára fisk, eða sama árgang og var þar í mestu magni í fyrra (mynd 2). Við Íslands-Færeyjarhrygginn var eins og tveggja ára fiskur í meirihluta, en eldri fiskur sást þó saman við ungfiskinn, sérstaklega austan til á svæðinu. Í hlýjum sjó suðaustur af Jan Mayen varð einnig vart við kolmunna, þótt þéttleikinn hafi verið mun minni en sunnar. Ekkert varð vart við makríl í leiðangri Árna Friðrikssonar í ár en á undanförnum árum hafa yfirleitt fengist fáeinir fiskar í einstaka togum milli Íslands og Færeyja. Þessar niðurstöður gefa því ekki tilefni til að álykta eitthvað um makrílgengd inn á íslensk hafsvæði á komandi sumri. Í júlí verður farið í leiðangur til makrílrannsókna.

mynd með umfjöllun


2. mynd. Bergmálsgildi kolmunna í maí eftir leiðarlínum Árna Friðrikssonar.

Leiðangursstjóri í leiðangrinum á Árna Friðrikssyni var Guðmundur J. Óskarsson og skipstjóri Guðmundur Bjarnason.


Mynd 1 í fullum gæðum.
Mynd 2 í fullum gæðum.

» til baka

» prenta

 

Leit
Hafrannsóknastofnun | Skúlagötu 4, 121 Rvík | s: 575 2000 | fax: 575 2001 | hafro@hafro.is